वार्‍यावरती गंध पसरला, नाते मनाचे,
मातीमध्ये दरवळणारे, हे गाव माझे,
जल्लोष आहे आता उधाणलेला,
स्वर धुंद झाला मनी छेडलेला,
शहारलेला, उधाणलेला, कसे सावरावे ?

स्वप्नातले गाव माझ्यापुढे;
दिवसाचा पक्षी अलगद उडे;
थंडीच्या पदरावरती; चिमणी ही चिवचिवणारी;
झाडात लपले सगेसोयरे;
हा गाव माझा जुन्या आठवांचा;
लाटात हस-या या वाहत्या नदीचा;
ढगात उरले पाऊसगाणे कसे साठवावे ?

हातातले हात; मन बावरे;
खडकाची माया कशी पाझरे;
भेटीच्या ओढीसाठी श्वासांचे सुंदर ढलपे;
शब्दांना कळले हे गाणे नवे;
ही वेळ आहे मला गोंदणारी;
ही धुंद नाती गंधावणारी;
पुन्हा एकदा; ऊन भेटता कसे आवरावे ?