आंधळी जात.........

माझ्या डोळ्यातुन ओझरत्या
थेंबांतल्या सखे या तुझ्या जुन्या आठवणींना
आज ही सारी दुनिया "अश्रु" म्हणते
तु दिलेली अन आशेच्या उन्हात वाळवत ठेवलेली
जखम हीच दुनिया त्या एका शब्दातच ओली करते....

पण..... आता जणु सवय झाली
कालपर्यंतच्या माझ्या हळव्या मनाला
या ओल्या शब्दांची, सारख्या ओलावत्या जखमांची
रात्रीच्या एकांतात गप्पा मारत आता या मनाचा
दिवस काय आता त्याची रात्रही अगदी सहजच सरते....

सखे दुनिया म्हणजे भोवतालची हीच गर्दी सारी
नेहमीच या गर्दीच्या हाती शब्दांच्या नंग्या तलवारी
जिथं-तिथं ही आपलं सावज शोधत फ़िरते
या गर्दीची वार करण्याची [पाठीमागुन] रीत आगळीच असते
फ़क्त दोन-चार शब्दांच्या डोळ्यांनी पाहणारी ही जात आंधळी असते...
ही जात आंधळी असते.....

-- सचिन काकडे