कोरडे जे शेत आहे ओलित झाले पाहिजे
मुक्या जीवांचे दु:ख या बोलीत आले पाहिजे !
छते ऊन्हाची नांदते जीव पोळती
उफ़ाट्याच्या वाहणा पायामधूनी घालती
दाह त्यांच्या वेदनांचे, ठेवित गेले पाहिजे....!
आभाळ अंतरातले सोसतांना फ़ाटलेले
अश्रू डोळ्यातले गाळतांना गाठलेले
महापूरांना बांधाया,बांध घालीत गेले पाहिजे....!
नांगरल्या शेतापरी काळीज दु:ख साहते
घरे सुगीचे डोलता, स्वप्न हिरवे पाहिजे
अर्थ या स्वप्नातही पेरीत गेले पाहिजे
...कोरडे जे शेत आहे॥!

***विठ्ठल वाघ