प्रेमाचे चार ऋतू

वसंत -
वसंतातल्या पालवी-कळ्या
मोठ्या खट्याळ असतात छकुल्या
आसुसलेल्या डोळ्यांना, दडून,
हळूच आडून करतात वाकुल्या
-*-

- ग्रीष्म -
व्याकूळ दुपारची ऊन झुळूक
तहानेला करते त्राही त्राही
तोकड्या ओळींची तुझी चिठ्ठी
तळमळ करते लाही लाही
-*-

- हेमंत -
शिशिराच्या शिवेवर जर्द झाडं
फारच दिलदार नाही वाटत?
शिलंगणाचं सोनं काही
दसऱ्यालाच नाही वाटत
-*-

- शिशिर -
परवा पडलेला शुभ्र बर्फ
आज कसा दिसतो रटाळ
प्रेम संपता पत्रामधला
मजकूर जसा दिसतो गचाळ

योगदान : रेशमा