कसं सांगू तुला, काय वाटतं मला?
तुला तरी कळतंय का, काय झालंय मला?
माझंच मन मला विचारतंय, माझं बरोबर आहे का चुकतंय?
माझं मलाच कळत नाही, तुला तरी कशी सांगणार वेड्या?
पुढचा शब्द आठवतांना मागचा विसरत गेला
शब्दाशी शब्द जुळवतांना सगळा वेळ गेला
शब्दापेक्षा स्पर्शातून कळेल सगळं तुला
शब्दांच्या पलिकडचं काही ...........
शब्दांच्या बुडबुडयात पकडायचं नाही मला
शब्द फक्त प्रतिक आहे, भावनांचं ब्रम्ह आहे
अंतरात्मा जुळ्ल्यावर गरज काय सांगायची?
असंच वाटतं मला !!!!!!!!!!!!!!
मी तुझी अन तू माझा.............
एवढीच शिदोरी पुरेल आयुष्याच्या प्रवासाला
पण तरीही....................
हळवं मन व्याकुळ होतं खूप रडावंसं वाटतं
कितीही सावरलं तरी डोळ्यातलं पाणी वाहात राहतं
आणि विचारतं -- काय झालंय तुला? काय झालंय तुला??

-- विधि शिरोडकर

कधीतरी हे मेघ जमावे माझ्यासाठी
मातीनेही गंध लुटावा माझ्यासाठी ..

दोन तळी अश्रूंची भरली त्यात मजेने
चंद्राने विरघळून जावे माझ्यासाठी...

प्रेमाने मज कवळून घेण्या , जीवनलतिके,
कधीतरी तुज हात फुटावे माझ्यासाठी...

आकाशातिल आनंदाच्या हिंदोळ्यांनो ,
ह्या बाजुने कधी झुलावे माझ्यासाठी .....

श्वासांची पडतील फुले हि जिथे उद्याला
तिथे तुझे पाऊल असावे माझ्यासाठी....

योगदान : रेशमा

प्राण तू आहेस माझा...
श्वास तू आहेस माझा...
जो कधी सरणार नाही -
ध्यास तू आहेस माझा... !

दुःख तू आहेस माझे...
तू व्यथा आहेस माझी...
अंतही नाही जिला ती
तू कथा आहेस माझी... !

स्वप्न तू आहेस माझे...
तू अपेक्षा फक्त माझी...
प्रेमही तू मुग्ध माझे
प्रीत तू अव्यक्त माझी... !

भास तू आहेस माझा...
तू खुळी चाहूल माझी...
चकवते आहे मला जी
तीच ती तू हूल माझी... !

तू विसावा शांत माझा...
गाढ तू एकांत माझा...
जो जगूही देत नाही
तोच तू आकांत माझा... !

सूर तू आहेस माझा
तूच ना आवाज माझा ?
गीत तू आहेस माझे
तू सुरीला साज माझा... !

तू दिशा आहेस माझी
तू प्रतीक्षा दीर्घ माझी...
रोज मी जी भोगतो ती
तूच शिक्षा दीर्घ माझी... !

...एवढे सारे तरीही
तू कुणी नाहीस माझी
चार घटकाही खरे तर
पाहुणी नाहीस माझी

योगदान : रेशमा