मराठी बोला रे.....

म्हातारा आजोबा हा
सांगतो गोष्ट ऐका रे
एका म्हाता-या महाराणीची
करुण व्यथा रे...

बोटांवर मोजण्या इतुके
दिवस तिंचे उरले रे
कोणाहि नको भाग्य
तसले तिंच्या पदरी पडले रे...

मातीत मिळाली संपदा
राज्य घरांतचं संकोचले रे
मुलं विसरली तिला
तुकाराम-समर्थांचे दिवस आता गेले रे...

नऊवारी जड वाटते
स्त्रीअंगाची खरी शोभा रे
मुलं तामसिक वृत्तीची
कसे भयावह स्वप्न पडले रे...

नको मरण हे रोजचं
एकदा कंठस्नान घाला रे
बाळांनो तुम्ही तरी
मराठी बोला रे.....

-- चेतन फडणीस